Momentu horiek

Zirrara sentitu nuen 35. orrialdean.  Hortxe zabaldu nuen liburua, eta han zegoen bera, berde askotariko luma, leuna, dotorea. Harrotasuna ez zuen galdurik bi orrialdeen artean harrapatuta egon arren. Osotasunean ireki egin zitzaion, hegazterren baten buztanaren antzera,  beste irakurle bati, hau da, niri.

Atera nahian zebilela iruditu zitzaidan.  Ez da harritzekoa.  Luma, nahiz eta ia laua izan, estu eta larri egonen zen han.  Leku txikiegi hegaz egin nahi duenarendako. Baina era berean, makina bat irakurle ezagutu nahi zituela zirudien. Ondoan zituen bi amodiozko istorioetan bezala, konkista moduan edo, abentura berri batek dakarren barneko bizipozaren antzekoa sentitzeko asmoz. Mugitu zela nabarmendu nuen, beharbada orriek astintzen zuten haizearen poderioz, gutxi bazen ere. Agian, bat-bateko argitasunak itsutu egin zuen.  Nolanahi ere, lumak handik atera nahi zuelakoan nengoen.

Hiru eta bost. 8. Bukaera bat. Hasiera: Reiki.

Xarmantzen hasia zen liburua ireki orduko. Desioaren aztarnak kobazulotik alde eginda, hiru eta bost, 8: itxaropena eta desioen hautua, sormena eta barne bakea, abentura eta errealismoa, oreka eta aldaketa. Numerologia. Bizitza bera.